ताज्या बातम्यामहाराष्ट्रराजकीय

गोविंद बागेत ठरलं, राजू शेट्टी राष्ट्रवादीच्या कोट्यातून विधानपरिषदेवर

शेट्टींनी पाहिलं बारामतीचं कृषीवैभव

बारामती : राज्यपाल नियुक्त सदस्य म्हणून राष्ट्रवादी काँग्रेसच्या कोट्यातून विधान परिषदेवर जाण्याचा प्रस्ताव स्वाभिमानी शेतकरी संघटनेचे राजू शेट्टी यांनी स्वीकारला आहे. शेट्टी यांनी आज बारामतीत राष्ट्रवादी काँग्रेसचे सर्वेसर्वा शरद पवार यांची भेट घेतली. या भेटीत शेट्टी यांनी राष्ट्रवादीकडून विधान परिषेदत प्रतिनिधित्व करण्यास होकार दिला.

बारामतीतील शरद पवार यांच्या गोविंद बाग या निवासस्थानी शेट्टी यांनी पवारांची भेट घेतली. यावेळी खासदार सुप्रिया सुळे उपस्थित होत्या. तर शेट्टी यांच्यासोबत संघटनेचे स्थानिक नेते सतीश काकडे तसेच राजेंद्र ढवाणही होते. अत्यंत खेळीमेळीच्या वातावरणात शेट्टी व पवार यांच्यात चर्चा झाली. या चर्चेनंतर खास फोटोसेशनही झालं. या चर्चेत शेट्टी यांनी राष्ट्रवादीकडून आलेला आमदारकीचा प्रस्ताव मान्य केल्याचे स्वाभिमानी संघटनेतूनच सांगण्यात आलं.

दरम्यान, राष्ट्रवादीच्या कोट्यातून राजू शेट्टी यांनी राज्यपालनियुक्त आमदार व्हावं, असं अधिकृत प्रस्ताव राष्ट्रवादीने शेट्टी यांना दिला होता. शरद पवार यांच्या सूचनेनुसार हा प्रस्ताव देण्यात आला होता. पवार यांच्या सांगण्यावरून खुद्द प्रदेशाध्यक्ष जयंत पाटील हा प्रस्ताव घेऊन राजू शेट्टी यांच्या घरी गेले होते. मात्र शेट्टी यांनी लगेचच कोणताही निर्णय घेतला नव्हता. या प्रस्तावाबाबत स्वाभिमानी संघटनेचे कार्यकर्ते व राज्य व्यवहार समिती निर्णय घेईल असे शेट्टी यांनी पाटील यांना सांगितले होते. दरम्यान, शेतकऱ्यांचे प्रश्न विधिमंडळात मांडण्यासाठी राजू शेट्टी यांच्यासारखा आक्रमक व अभ्यासू नेत्यानेच प्रतिनिधित्व करावे, असा आग्रह संघटनेतून धरला गेला आणि त्या आग्रहातूनच शेट्टी यांनी राष्ट्रवादीचा प्रस्ताव स्वीकारल्याचे सांगण्यात येत आहे. शेट्टी विधान परिषदेत असल्यास त्यांच्या अनुभवाचा महाविकास आघाडीला फायदा होईलच शिवाय शेतकऱ्यांच्या हिताचेही अनेक प्रश्न सोडवले जातील, अशी संघटनेला आशा आहे.

शेट्टींनी पाहिलं बारामतीचं कृषीवैभव

शेट्टी यांच्या बारामती भेटीत आज अनोखे दृष्य पाहायला मिळाले. शेट्टी यांनी ऊसदराच्या मुद्द्यावरून सहा वर्षांपूर्वी गोविंद बागेत जाऊन आंदोलन केले होते. त्याच गोविंद बागेत आज त्यांनी पवारांचा आमदारकीचा प्रस्ताव स्वीकारला. शेट्टी सुमारे तीन तास बारामतीत होते. यादरम्यान, स्वत:च्या कारमधून पवार यांनी त्यांना कृषीसमृद्ध बारामतीचं दर्शन घडवलं. शेट्टी यांच्यासह पवारांनी बारामतीतील प्रकल्पांना भेट दिली. देशी गोवंश अनुवंश सुधार प्रकल्प हा महत्त्वाकांक्षी प्रकल्प आहे. शेतकऱ्यांसाठी गिर,साहिवाल,खिलार, पंढरपुरी, मुर्रा म्हैस या देशी जनावरांसंबंधी संशोधनकार्य इथे होतं. ट्रस्टने राष्ट्रीय कृषी योजना आणि टाटा ट्रस्ट यांच्या संयुक्त प्रयत्नांनी उभारलेल्या डेअरी प्रकल्पामार्फत दुधाची, रक्ताची तपासणी, चाऱ्याची तपासणी तसंच पशुपालनाचं प्रशिक्षण दिलं जातं. शेण, गोमूत्र आणि दुधावर मूल्य संवर्धन प्रक्रिया केंद्रही येथे उभारलं जात आहे. नेदरलँडच्या तंत्रज्ञानावर आधारलेल्या भाजीपाला गुणवत्ता केंद्रातही पवार शेट्टींना घेऊन गेले. ही उत्तम वाणाची रोगप्रतिकारशक्ती असलेली भाजीपाल्याची रोपं ना नफा ना तोट तत्त्वावर शेतकऱ्यांना विकली जातात. या रोपांमार्फत अधिक उत्पादन काढण्यासंबंधी कन्सल्टन्सीही येथे केली जाते. एवढंच नाही तर झालेल्या उत्पादनाचं ग्रेडिंग करून निर्यात वा स्थानिक बाजारपेठेत विक्रीव्यवस्थेचं मार्गदर्शनही केलं जातं. राज्यभरातील शेतकरी इथल्या प्रशिक्षणाचा लाभ घेतात, अशी माहिती यावेळी देण्यात आली. ब्राझिलच्या जातीपासून एम्ब्रियोमार्फत तयार केलेल्या कालवड प्रकल्पालाही या नेत्यांनी भेट दिली.

Share

Maha Varta

महावार्ता हे न्यूज पोर्टल असून देशविदेशासह महाराष्ट्रातील ताज्या घडामोडी मराठी वाचकांपर्यंत देत आहोत.

Leave a Reply

Your email address will not be published. Required fields are marked *

Close
Close