देशविदेश
Trending

लाल किल्यावर कोरोना सावटाखाली असा होणार यंदाचा स्वातंत्र्यदिन

नवी दिल्ली : देशातील करोना रुग्णांची संख्या ही ९ लाखांवर गेली आहे. अशातच पुढच्या महिन्यात येणाऱ्या स्वातंत्र्य दिनाच्या अर्थात १५ ऑगस्टच्या सेलिब्रेशनवर करोनाचे सावट आहे. स्वातंत्र्यानंतर देशाच्या इतिहासात पहिल्यांदाच राजधानी दिल्लीतील लाल किल्ल्यावर अतिशय वेगळ्या प्रकारे स्वातंत्र्य दिन साजरा होण्याची शक्यता आहे. दरवर्षी स्वातंत्र्य दिनाला साजऱ्या होणाऱ्या अनेक कार्यक्रमांना करोनामुळे कात्री बसण्याची शक्यता आहे. तसंच गेल्या वर्षाच्या तुलनेत या कार्यक्रमाला फक्त २० टक्केच व्हीव्हीआयपी किंवा इतर मान्यवर उपस्थित राहतील. फक्त या व्हीव्हीआयपींना प्रत्यक्षपणे पंतप्रधान मोदींचे लाल किल्ल्यावरील भाषण ऐकता येणार आहे, असं वृत्त एएनआय या वृत्तसंस्थेनं दिलं आहे.

संरक्षण सचिव अजय कुमार आणि पुरातत्व विभागाचे महासंचालक यांनी गेल्याच आठवड्यात लाल किल्ल्याला भेट दिली. १५ ऑगस्टसाठीच्या तयारीचा आढावा यावेळी घेण्यात आला. संरक्षण सचिव अजय कुमार सद्यस्थितीची माहिती घेतली. कुमार यांनी कार्यक्रमाचे व्यवस्थापन करणाऱ्या संबंधित अधिकाऱ्यांशी चर्चा केली. तसंच सोशल डिस्टन्सिंगचा विचार करून कार्यक्रमस्थळी नियोजन करण्यात यावे, अशा सूचना त्यांनी दिल्या. यंदाच्या स्वांतत्र्य दिनाचा कार्यक्रम यापूर्वी झालेल्या कार्यक्रमांपेक्षा पूर्णपणे वेगळा असेल. लाल किल्ल्यावरील कार्यक्रमात यंदा शालेय विद्यार्थी आणि नॅशनल कॅडेट कॉर्प्सच्या (NCC) कॅडेट्सचा सहभाग नसेल, अशी माहिती सूत्रांनी दिली.

तसंत पंतप्रधान नरेंद्र मोदी लाल किल्ल्यावर ज्या ठिकाणी देशाला उद्देशून भाषण करतील तेथील मंचावर कुठल्याही व्हीव्हीआयपीला बसवलं जाणार नाही. यापूर्वी जवळपास ९०० व्हीव्हीआयपी पंतप्रधानांच्या भाषणावेळी दोन्ही बाजूला बसत होते. यावेळी त्यांना तिथे बसवण्यात येणार नाही. त्यांची व्यवस्था त्याहून खाली असलेल्या जागेवर करण्यात येणार आहे. तसंच फक्त शंभरावर व्हीव्हीआयपींना तिथे बसवलं जाणार आहे.

यंदाच्या कार्यक्रमाचं हे असेल विशेष

देशातच नव्हे तर जगावर करोनाचे संकट आहे. पण या करोनावर देशातील अनेक नागरिकांनी यशस्वीपणे मात केली आहे. यात करोनाविरोधी लढाई लढणाऱ्या करोना योद्ध्यांचाही समावेश आहे. यंदाच्या कार्यक्रमाला करोनामुक्त झालेल्या १५०० करोना योद्ध्यांना निमंत्रित केले जाणार आहे. यापैकी ५०० योद्धे हे पोलीस विभागातील असतील. उर्वरीत १००० जण हे विविध राज्यातील आणि विभागातील योद्धे असतील. गेल्या वर्षापर्यंत १५ ऑगस्टच्या लाल किल्ल्यावरील स्वातंत्र्य दिनाच्या कार्यक्रमाला जवळपास १० हजार नागरिकांची उपस्थिती होती. पण यंदा ही संख्या निम्म्याहूनही अधिक कमी असणार आहे. लाल किल्ल्यावरील १५ ऑगस्टच्या कार्यक्रमासंदर्भात अलिकडे संरक्षण मंत्रालयाची बैठक झाली. यावेळी सामान्य नागरिकांऐवजी करोनावर मात करणाऱ्या आणि करोनाशी लढणाऱ्या करोना योद्ध्यांना निमंत्रित करण्यात यावं. त्यांच्या अमुल्य उपस्थितीने यंदाचा स्वातंत्र्य दिन साजरा केला जावा, असा निर्णय घेण्यात आला. यानुसार केंद्रीय गृहमंत्रालयाकडून या कार्यक्रमाची तयारी करण्यात येत आहे.

Share

Maha Varta

महावार्ता हे न्यूज पोर्टल असून देशविदेशासह महाराष्ट्रातील ताज्या घडामोडी मराठी वाचकांपर्यंत देत आहोत.

Leave a Reply

Your email address will not be published. Required fields are marked *

Close
Close