गजा मारणेची ९ किलोमीटर धिंड काढणारे पुण्याचे ACP जाधव सेवानिवृत्त, मुळशीतही कोरोना काळात राहिले होते सतर्क

मुळशीतील हिंजवडी पोलिस स्टेशन श्रीधर जाधव यांच्या कक्षेत होते. कोरोना काळात हिंजवडी पोलिस स्टेशनचे तत्कालिन वरिष्ठ पोलिस निरिक्षक कोरोना सुरक्षापेक्षा जमीन व्यवहारात मग्न होते. महावार्ताने याकडे लक्ष दिले असता जाधव यांनी संबंधित अधिकार्‍यांला समज देऊन कोरोना मुक्त मुळशीसाठी काम करण्यास सुनवले होते.

सेवानिवृत्त झाल्यानंतर श्रीधर जाधव यांनी पाठवलेला संदेश

सप्रेम जय हिंद
सरकारी नोकरी मधील शिरस्त्याप्रमाणे मी पोलीस खात्यातील माझ्या 33 वर्षांच्या प्रदीर्घ सेवेनंतर सेवानिवृत्त होतोय.
मी पोलीस खात्यातील माझ्या सेवेच्या वाटचालीत ‘” एकच तारा समोर आणि पायतळी अंगार “‘ ह्या पी.टी.सी. मधील चौथऱ्यावर कोरलेल्या कुसुमाग्रजांच्या कवितेतील ओळी पासून सुरुवातीस प्रेरणा घेऊन पुढील कालावधीत ” सद्रक्षणाय खलनिग्रहणाय ” हे महाराष्ट्र पोलीस दलाचे ब्रीदवाक्य प्रमाण मानून प्रामाणिकपणे कर्तव्य बजावले आहे.
माझा हा पोलिस खात्यातील खडतर प्रवास ज्यांच्यामुळे सुखकर होऊन मी तो यशस्वीरीत्या पूर्ण करू शकलो अशा सर्व वरिष्ठ अधिकारी, बॅचमेट , सर्व कनिष्ठ अधिकारी, सर्व अमलदार यांचे हार्दिक आभार व धन्यवाद व्यक्त करतो. पोलीस खात्यामध्ये कायद्याच्या व शिस्तीच्या अंमलबजावणीच्या सद्हेतूने काम करत असताना कळत नकळत काहीजण दुखावले गेले असतील तर त्याबद्दल मी दिलगिरी व्यक्त करतो.
आपण सर्वांनी माझ्या पोलिस खात्यातील सेवे दरम्यान जे मार्गदर्शन केले, जे सहकार्य केले त्याचे ऋण केवळ आभार मानून किंवा धन्यवाद देऊन फिटणार नाही हे मला ठाऊक आहे म्हणून मी कायम आपल्या ऋणात राहू इच्छितो.
शेवटी एवढेच सांगू इच्छितो,

आज निवृत्तीच्या उंबरठ्यावर
डोळे भरून येतात……
उरतात फक्त आठवणी
वर्ष सरून जातात …….
आम्ही जातो आमच्या गावा | आमचा राम राम घ्यावा ||
जय हिंद ! जय महाराष्ट्र ! जय भारत !

श्रीधर जाधव
सहाय्यक पोलीस आयुक्त
वाकड विभाग पिंपरी चिंचवड
आयुक्तालय