दाजीपूर अभयारण्यात पर्यटकांना राणोजी पट्टेरी वाघाचे दर्शन
वनरक्षक प्रकाश कोरगावकर यांच्या सतर्कतेमुळे पर्यटकांना अविस्मरणीय अनुभव; वाघाच्या दर्शनाचे फोटो सोशल मीडियावर व्हायरल
कोल्हापूर (राजेंद्र मकोटे) : जैवविविधतेचे माहेरघर आणि गव्यांच्या अधिवासासाठी प्रसिद्ध असलेल्या दाजीपूर अभयारण्याच्या घनदाट जंगलात पर्यटकांना चक्क पट्टेरी वाघाचे अगदी जवळून दर्शन घडले. जंगल सफारीदरम्यान अचानक झालेल्या या अनपेक्षित दर्शनामुळे पर्यटकांच्या आनंदाला पारावार उरला नाही. या वाघाच्या दर्शनाचे छायाचित्र आणि व्हिडिओ सध्या सोशल मीडियावर व्हायरल होत आहेत.
दाजीपूरच्या जंगलात आज सकाळी वनविभागाच्या जीपमधून तीन पर्यटक जंगल सफारीचा आनंद घेत होते. त्यांच्यासोबत वनरक्षक प्रकाश कोरगावकर हे मार्गदर्शक म्हणून होते. जंगलातील सफारी सुरू असताना अचानक त्यांना ‘राणोजी’ या नावाने ओळखल्या जाणाऱ्या पट्टेरी वाघाचे दर्शन झाले. जंगलाच्या नैसर्गिक अधिवासात मुक्तपणे वावरणारा हा वाघ अगदी जवळून दिसल्याने पर्यटकांना एक वेगळाच रोमांचकारी अनुभव मिळाला. जंगलात वाघाचे दर्शन होणे ही तशी दुर्मीळ बाब असल्याने पर्यटकांसाठी हा क्षण विशेष ठरला.
दाजीपूर अभयारण्य म्हटले की डोळ्यांसमोर गव्यांचे कळप, घनदाट वनराई, विविध प्रकारचे वन्यजीव आणि निसर्गसौंदर्य उभे राहते. मात्र, या जंगलात पट्टेरी वाघाचे दर्शन झाल्याने दाजीपूरच्या समृद्ध जैवविविधतेचे महत्त्व पुन्हा एकदा अधोरेखित झाले आहे. वाघ हा जंगलाच्या परिसंस्थेतील सर्वोच्च शिकारी प्राणी असून त्याची उपस्थिती जंगलातील नैसर्गिक अन्नसाखळी आणि पर्यावरणीय समतोलाच्या दृष्टीने महत्त्वपूर्ण मानली जाते.
दरम्यान, दाजीपूर अभयारण्याला भेट देणाऱ्या पर्यटकांनी वनविभागाच्या नियमांचे काटेकोर पालन करावे. जंगल सफारीदरम्यान निर्धारित मार्ग सोडून अन्यत्र जाऊ नये. वाहनांचा वेग मर्यादित ठेवावा तसेच वन्यप्राण्यांना त्रास होईल असे वर्तन करू नये. वन्यजीवांच्या अगदी जवळ जाण्याचा किंवा त्यांना आकर्षित करण्याचा प्रयत्न करू नये. जंगल हे वन्यप्राण्यांचे नैसर्गिक निवासस्थान असून पर्यटकांनी त्यांच्या अधिवासाचा आदर राखूनच जंगल सफारीचा आनंद घ्यावा, असे आवाहन वनविभागाच्या वतीने करण्यात आले आहे.
- गव्यांच्या दर्शनासाठी प्रसिद्ध असलेल्या दाजीपूरच्या जंगलात पट्टेरी वाघाचे झालेले हे दर्शन पर्यटकांसाठी अविस्मरणीय ठरले असून, दाजीपूरच्या वनवैभवाची पुन्हा एकदा चर्चा सुरू
झाली आहे..
