गोकुळच्या चेअरमन निवडीचा मार्ग अखेर मोकळा- १० नोव्हेंबर रोजी बैठक घेण्याचे न्यायालयाचे आदेश –
कोल्हापूर (राजेंद्र मकोटे) : आशिया खंडातील सर्वात मोठा नावलौकिक असलेल्या कोल्हापूर जिल्हा सहकारी दूध उत्पादक संघ अर्थात ‘गोकुळ’मध्ये निवडणुकीनंतर झालेल्या अभूतपूर्व सत्तांतरानंतरही रखडलेला चेअरमन निवडीचा मार्ग आता मोकळा होण्याची चिन्हे निर्माण झाली आहेत. गोकुळच्या अध्यक्षपदाची निवड करण्यासाठी येत्या १० नोव्हेंबर रोजी बैठक घेण्याचे आदेश न्यायालयाने दिल्याने गेल्या काही दिवसांपासून सुरू असलेल्या राजकीय आणि सहकार क्षेत्रातील संघर्षाला महत्त्वपूर्ण वळण मिळाले आहे. न्यायालयाच्या या आदेशामुळे दूध उत्पादक सभासद आणि शेतकरी वर्गातून समाधान व्यक्त होत आहे.
गोकुळच्या निवडणुकीत सत्ताधारी गटाला १३, तर विरोधी गटाला १२ जागा असे अत्यंत निसटते बहुमत मिळाले आहे. अवघ्या एका मताच्या फरकाने सत्तेचे गणित ठरत असल्याने चेअरमन निवडीची प्रक्रिया सुरुवातीपासूनच राजकीय प्रतिष्ठेची बनली आहे. अध्यक्षपदाची निवड करताना दोन्ही गटांकडून सदस्यांची जुळवाजुळव आणि आपापले संख्याबळ टिकविण्यासाठी प्रयत्न सुरू आहेत.
यापूर्वी झालेल्या चेअरमन निवडीच्या सभेत विरोधी गटाचे सर्व सदस्य गैरहजर राहिल्याने सभेचा कोरम पूर्ण होऊ शकला नव्हता. परिणामी, नियोजित सभा तहकूब करण्याची वेळ आली होती. या घडामोडीनंतर सत्ताधारी गटाने समांतर सभा घेऊन आमदार सतेज पाटील यांनी शशिकांत पाटील यांची चेअरमनपदी निवड झाल्याचे जाहीर केले होते. या निवडीच्या प्रक्रियेवरून निर्माण झालेला वाद न्यायालयापर्यंत पोहोचला आणि यासंदर्भात न्यायालयात दाद मागण्यात आली होती.
अध्यक्षपदाची निवड प्रक्रिया पारदर्शक आणि नियमानुसार पार पडावी, यासाठी न्यायालयीन हस्तक्षेपाची मागणी करण्यात आली होती. त्यावर सुनावणीदरम्यान न्यायालयाने १० नोव्हेंबर रोजी बैठक घेण्याचे आदेश दिल्याने रखडलेल्या निवड प्रक्रियेला आता गती मिळण्याची शक्यता आहे.
एका मताचे बहुमत, त्यामुळे उत्सुकता शिगेला!
गोकुळच्या सत्तेचे गणित अवघ्या एका मतावर अवलंबून असल्याने १० नोव्हेंबरच्या बैठकीकडे संपूर्ण जिल्ह्याचे लक्ष लागले आहे. यापूर्वी कोरमअभावी सभा होऊ न शकल्याचा अनुभव पाहता यावेळी सर्व सदस्य उपस्थित राहणार का, अध्यक्षपदाची निवडणूक सुरळीत पार पडणार का आणि न्यायालयाच्या आदेशानंतर नेमकी कोणती भूमिका घेतली जाणार, याबाबत उत्सुकता निर्माण झाली आहे.
गोकुळ हा लाखो दूध उत्पादक शेतकरी, दूध संस्था आणि सहकार क्षेत्राशी निगडित असलेल्या घटकांच्या आर्थिक हिताचा महत्त्वाचा आधार आहे. त्यामुळे या संस्थेतील नेतृत्वाचा प्रश्न केवळ राजकीय प्रतिष्ठेपुरता मर्यादित नसून दूध उत्पादकांच्या हिताच्या दृष्टीनेही महत्त्वाचा आहे.
न्यायालयाच्या आदेशामुळे चेअरमन निवडीच्या प्रक्रियेला आता दिशा मिळाली असून १० नोव्हेंबरची बैठक गोकुळच्या भविष्यातील सत्ताकारणाच्या दृष्टीने निर्णायक ठरण्याची शक्यता आहे. त्यामुळे या बैठकीत काय घडणार, याकडे सहकार क्षेत्रासह संपूर्ण कोल्हापूर जिल्ह्याचे लक्ष लागले आहे. ही सर्व निवडणूक प्रक्रिया निवडणूक अधिकारी मौसमी चौगुले यांच्या नेतृत्वाखाली यांच्या अध्यक्षतेखाली पार पडली जाणार आहे त्यांची जरी संभाजीनगर येथे पदोन्नतीवर बदली झाली असली तरीही सीएसआर आणि गोकुळ निवडणूक प्रक्रिया पूर्ण झाल्यावरच त्यांना तिकडे कार्य भारघेण्याचे आदेश देण्यात आ
ले आहे
