शुभमन गिलच्या नेतृत्वाखालील टीम इंडियाने श्रीलंका दौऱ्याची दणकेबाज सुरुवात करत गॉल येथील पहिल्या कसोटी सामन्यात 165 धावांनी विजय नोंदवला. अंतिम दिवशी श्रीलंकेला विजयासाठी कठीण आव्हान मिळाले होते, परंतु भारतीय गोलंदाजांच्या शिस्तबद्ध आणि भेदक माऱ्यासमोर यजमान संघाचा दुसरा डाव 206 धावांवर आटोपला. या विजयासह भारताने दोन सामन्यांच्या मालिकेत 1-0 अशी आघाडी घेतली असून, वर्ल्ड टेस्ट चॅम्पियनशिपच्या (WTC) गुणतालिकेतही आपले स्थान अधिक मजबूत केले आहे.
श्रीलंकेविरुद्धच्या गॉल कसोटीतील विजयामुळे भारताच्या खात्यात 12 गुणांची भर पडली आहे. सामन्यापूर्वी भारताचे 52 गुण होते. आता हे गुण 64 झाले आहेत. तसेच भारताची विजयाची टक्केवारी म्हणजेच पीसीटी 48.15 टक्क्यांवरून 53.33 टक्क्यांवर पोहोचली आहे. मात्र या शानदार विजयानंतरही डब्ल्यूटीसी गुणतालिकेत भारताच्या स्थानात बदल झालेला नाही. टीम इंडिया पाचव्या स्थानावरच कायम आहे.
भारताने दिलेल्या 372 लक्ष्याचा पाठलाग करताना श्रीलंकेने दुसऱ्या डावात चांगली झुंज देण्याचा प्रयत्न केला. सोनल दिनुशाने 84 धावा केल्या, तर धनंजया डी सिल्वाने 59 धावांची खेळी करत प्रतिकार केला. मात्र भारतीय गोलंदाजांनी निर्णायक क्षणी विकेट्स मिळवत श्रीलंकेला पुनरागमनाची संधी दिली नाही. मानव सुथारने पुन्हा एकदा प्रभावी गोलंदाजी करत 5 विकेट्स घेतल्या, तर प्रसिद्ध कृष्णाने 2 विकेट्स मिळवल्या. अखेर श्रीलंकेचा संपूर्ण डाव 206 धावांवर संपला आणि भारताने सामना 165 धावांनी जिंकला
