अमृतमहोत्सवी वर्षानिमित्त खाशाबांच्या पोस्टरचे प्रकाशन, क्रीडा चर्चासत्राचे आयोजन
कोल्हापूर: राजे साळुंखे चालुक्य राजवंश प्रतिष्ठान व कोल्हापूर जिल्हा व शहर रेसलिंग असोसिएशन संयुक्त विद्यमाने कोल्हापूरात प्रथमच ऑलिम्पिकवीर खाशाबा जाधव यांचा 74 वा पदकदिन समारंभ साजरा करण्यात येणार आहे.
स्वतंत्र भारतासाठी 23 जुलै 1952 रोजी खाशाबा जाधव यांनी कुस्तीत पहिले ऑलिम्पिक पदक जिंकण्याचा पराक्रम केला होता. यानिमित्ताने कोल्हापूरतील श्री दत्त स्पोर्ट्स संकुलामध्ये क्रीडा चर्चासत्र व ऑलिम्पिकवीर खाशाबा पोस्टर प्रकाशन करण्यात येणार आहे.
जागतिक विजेती, ऑलिम्पिकपटू नेमबाज श्रीमती तेजस्वीनी सावंत, लेखक, क्रीडा अभ्यासक प्रा. संजय दुधाणे, राजे साळुंखे चालुक्य राजवंश प्रतिष्ठानचे अध्यक्ष शिवाजी साळुंखे व कोल्हापूर जिल्हा व शहर रेसलिंग असोसिएशनचे अध्यक्ष रवींद्र पाटील यांच्या प्रमुख उपस्थितीत हा समारंभ होणार आहे. 
खाशाबा पुन्हा कोल्हापूरात घडण्यासाठी योजना व संकल्प या विषयावर चर्चासत्र होणार आहे. खाशाबा जाधव यांनी जिंकलेल्या पदकाचे यंदा अमृत महोत्सवी वर्ष असल्याने कोल्हापूरतील तालमी व शाळांना खाशाबा जाधवांचे 75 पोस्टर लेखक संजय दुधाणे यांच्या वतीने भेट देण्यात येणार आहे.
फिनलंड देशातील हेलसिंकी शहरात झालेल्या ऑलिम्पिक स्पर्धेत कराडच्या खाशाबा जाधव यांनी ४ लढती जिंकून ऐतिहासिक कामगिरी केली होती. या खाशाबांच्या अभूतपर्व कामगिरीला उजाळा देण्यासाठी प्रथमच खाशाबा जाधव यांचा 74 वा पदकदिन कोल्हापूरात साजरा होत असल्याचे राजे साळुंखे चालुक्य राजवंश प्रतिष्ठानचे अध्यक्ष शिवाजी साळुंखे यांनी सांगितले आहे.
*आज कोल्हापूरातच पद्मविभूषणची सुनावणी*
२३ जुलै १९५२ रोजी खाशाबांनी देशासाठी पहिले पदक जिंकले होते. याच दिवशी कोल्हापूर खंडपीठात खाशाबांच्या पद्मविभूषणची सुनावणी होणार आहे. खाशाबांनंतर पदक जिंकलेल्या सर्व ऑलि.म्पिक विजेत्यांना पद्म पुरस्काराने गौरवित करण्यात आले आहे. एकमेव खाशाबा या यादीत नाही. यामुळे २३ जुलै रोजीच्या सुनावणीत पद्मविभूषणवर शिक्कामार्तब झाला तर तो दुर्मीळ योगायोग असेल असे लेखक संजय दुधाणे यांनी सांगितले आहे.
